Edition 2023

Comunicat de premsa / Communiqué de presse

Parlar, cantar, dançar, en occitan. Un còp de mai, lo Festival Occitania tòrna tre la davalada a Tolosa e dins lo parçan ! Ongan, un vintenat d’eveniments vos permetràn de descobrir las creacions occitanas actualas tot lo mes d’octobre. Literatura, musica, dança, teatre, cinemà… lo Festenal se vòl pluridisciplinari e dobèrt a totas e totes. Portat per l’IEO 31 e en partenariat amb d’associacions localas e occitanas, dintratz al mièg de la cultura nòstra, a partejar sens moderacion.

Començam tre lo 16 de setembre, a Sent Lis : las classas occitanistas del Collègi Léo Ferré vos convidan al sound sistem pels pichons d’Humpty Dumpty per una vesprada boleganta. Totjorn a Sent Lis, en partenariat amb lo Païs de Catinou, aculhirèm la conférencia de Joan-Miquèu Espinasse “Còrnamusas occitanas peus nuls”, seguit del concèrt de swing gascon d’Adi’Jazz. Una serada gascona de mancar pas !

L’inauguracion del Festenal se farà lo 30 de setembre a la Bibliotèca d’Estudis e del Patrimòni de Tolosa a l’escasença de la sortida d’un Diari especial, dedicat a Robèrt Lafont pel centenari de sa naissença. La taula redonda s’acabarà per un concèrt d’Eric Fraj amb de poèmas de Robèrt Lafont.

De concèrts, n’i aurà per totes los gosts : Severina Bonnin (cançon occitana) per la sortida de son albom nòu, Bombadissa (ragga balèti familial) per la Fèsta Occitana de Senta Gabèla, Otxo (musica actuala vintage del futur) a La Topina, Delta Sònic (groove rural, son urban) & Varalh Prod (mix transe-òc) al DAda, Las Arribèras & Nat sei pas (cants polifonics) per Canta Carbona, Primaël amb Pantxix Bidart (cançons oc e euskara) a Tolosa, lo jove grop Diluvienne (trio polifonic) a las Ogresses…

E per dançar, cal de balètis ! Pel lançament de la sason de la MJC del Pont de las Domaisèlas, Peldrút vendrà enflamar la cort lo 22 de setembre ! Per se faire mesclar e rencontrar las culturas, lo grop breton Loened Fall partejarà l’empont amb lo grop occitan de Gironda Lo Silenci de la Flor per un Fest-noz balèti de tria organizat per Breizh en Oc a Cunhaus. L’escasença de s’iniciar als cants e a las danças bretonas. Puèi, Mathys Marie assegurarà lo bal mesadièr de La Maison Blanche a Tolosa.

Costat teatre, la Comedia Occitana Tolzana farà doas representacions de la peça “Du côté de la COT” a Santa Fe d’Agrafuèlha e a Bretx.

Nòstra librariá La Tuta d’Òc convidarà Daidièr Mir per un rencontre literari e cinematografic a l’entorn de son filme “Leis Inaudibles” que serà projectat, sul vilatge de Bròve (83), vòidat per l’armada francesa en 1974. Un obratge caleïdoscopic que multiplica los punts de vista e los biaisses de dire aquela istòria.

Enfin, poirètz tanben visitar Tolosa en occitan, rire amb l’espectacle comic de Clamenç, descobrir la toponimia blanhaquesa amb l’associacion Blagnac Histoire et Mémoire, e tot un fum d’autras suspresas de descobrir en detalh sul site internet de l’IEO 31 !

Traparetz lo programa complet suls rets socials Facebook (@festivaloccitania) e Twitter (@festoccitania) e sul site www.festivaloccitania.com

Vos disèm a plan lèu !

Contactes : contacte@festivaloccitania.com / contacte@ieo31.com / 05 61 11 24 87

Vous souhaitez soutenir et vous associer au Festival Occitania? Contactez nous au:

©IEO31 2023